Rezultatet

Për 13 vite radhazi, Future is Here ka qenë programi kryesor i trajnimit në kuadër të programit edukativ të DokuFest, duke kultivuar talentin e të rinjve të Kosovës dhe duke i kthyer ideat e tyre krijuese në filma dokumentarë të fuqishëm. 

I konceptuar si më shumë se një punëtori për realizimin e filmave, Future is Here është një udhëtim transformues ku pjesëmarrësit eksplorojnë teknikat e rrëfimit, artin vizual dhe mendimin kritik, ndërsa promovojnë bashkëpunimin dhe shprehjen e vetvetes. Programi fokusohet në mësimin praktik, ku pjesëmarrësit përfshihen aktivisht në çdo fazë të procesit të realizimit të filmit—nga konceptimi i ideve deri te montazhi. Duke i bashkuar regjisorët e rinj me mentorë me përvojë dhe ish-pjesëmarrës, programi krijon një hapësirë unike për zhvillimin e aftësive, vetëbesimit dhe lidhjeve kuptimplota.  

Premierat e filmave të realizuar nga nxënësit shfaqen në një mrëmje të veçantë përgjatë festivalit në DokuFest.

Suksesi i qëndrueshëm i Future is Here thekson fuqinë transformuese të filmave dokumentarë. Përderisa peizazhi kulturor i Kosovës evoluon, programe të tilla sigurojnë jo vetëm një të ardhme të qëndrueshme, por edhe të mbushur me krijimtari dhe autenticitet. Për regjisorët e rinj, udhëtimi fillon këtu—dhe për audiencën, rrëfimet që ata tregojnë do të rezonojnë për vite me radhë.  

REZULTATET KRYESORE:  

—Inkurajimi i rrëfimit të tregimeve autentike përmes filmit

—Zhvillimi i kapaciteteve kreative dhe teknike të pjesëmarrësve në fushën e kinematografisë

—Sigurimi i mentorimit nga ekspertë vendas dhe ndërkombëtarë të filmit

—Pjesëmarrja e ish-studentëve si mentorë për brezat e rinj

—87 filma dokumentar të realizuar

—116 të rinj pjesëmarrës, prej të cilëve 66 vajza dhe 50 djem  

—Të rinj pjesëmarrës nga 10 Komuna të Kosovës dhe 1 e Shqipërisë

Të gjithë filmat e prodhuar nga Future is Here gjenden në Bibliotekën Digjitale për Mësimdhënës të DokuFest, një platformë online e menaxhuar nga departamenti edukativ DokuLab. Kjo platformë përfshin filma dhe materiale didaktike të dizajnuara për të mbështetur përdorimin e filmit në klasë, në përputhje me Kornizën Kurrikulare të Republikës së Kosovës. Aktualisht, ajo është duke u përdorur nga 400 mësimndhënës nga e gjithë Kosova. 

Future is Here është pjesë e projektit Shkollat dhe Dokumentarët, i mbështetur nga National Endowment for Democracy.