Aktivitetet

KAMPI I PARË NDËRKULTUROR

Nga 29 janar deri më 4 shkurt 2024, DokuFest organizoi kampin e parë ndërkulturor të projektit “Stories We Tell”, duke bashkuar 18 të rinj nga komunitete të ndryshme të Kosovës me qëllim që përmes fuqisë së artit dhe tregimit të historive, të thyej barrier shoqërore të cilat shkaktojnë ndasi.

Gjatë kampit, pjesëmarrësit hulumtuan sesi arti mund të përdoret për të sjellë në dritë histori të pathëna dhe për të trajtuar tema të ndjeshme sociale. Nga Prizreni në Prishtinë, ata u njohën me trashëgiminë kulturore të Kosovës dhe forma bashkëkohore të të shprehurit, duke përfshirë animacionin dhe dokumentarin. Takimet me organizata që merren me gazetari alternative dhe aktivizëm kulturor i ndihmuan të kuptonin më thellë rolin e tregimit të historive në fuqizimin e komuniteteve dhe promovimin e ndryshimeve sociale.

Në fund të kampit, pjesëmarrësit ndanë përvojat e tyre përmes intervistave individuale, duke reflektuar mbi sfidat dhe realitetet e përbashkëta që i lidhin, pavarësisht prejardhjes së tyre. Këto intervista u shfaqën në formë të ekspozitës gjatë kampit të dytë kulturore në Kino Armata në Prishtinë. 

KAMPI I DYTË NDËRKULTUROR

Nga 27 Maj deri më 2 Qershor organizuam edicionin e dytë të kampit ndërkulturor i cili mblodhi për herë të dytë të rinj nga komunitete të ndryshme në Kosovë për një javë shkëmbimi kulturor. Pjesëmarrësit patën mundësinë të njihen mes vete dhe të mësojnë mbi procesin e xhirimit dhe editimit përmes një ligjeratave mbi procesin e filmbërjes. Në ditët në vijim, ata realizuan video portrete, zhvilluan vizita dhe punuan në portretizimin e njëri-tjetrit përmes xhirimeve, duke përfunduar me prezantime dhe diskutim të materialeve të tyre. 

Gjatë kampit, Flutura Balaj ndau eksperiencën e saj si filmbërëse e cila foli për fuqinë e artit në adresimin e sfidave shoqërore. Pjesëmarrësit gjithashtu vizituan redaksinë e Kosovo 2.0 dhe Qendrën e Dokumentimit për të Drejtat Humanitare, ndërsa në Kino Armata u mbajt lansimi i ekspozitës së kampit. 

Ditët e fundit përfshinë aktivitete të ndryshme dhe shfaqje filmash. Kampi u përmbyll me diskutime për përshtypjet dhe sugjerimet e pjesëmarrësve, ndërsa materialet e realizuara do të prezantohen në ekspozitën e dytë të DokuFest, duke sjellë në pah perspektivat dhe përvojat e tyre. 

KAMPI I TRETË NDËRKULTUROR

Nga 4 deri më 11 nëntor 2024, u mbajt kampi i tretë me 8 të rinj nga komunitete të ndryshme të Kosovës. 

Gjatë kampit, pjesëmarrësit morën pjesë në diskutime dhe punëtori praktike mbi filmbërjen, si dhe eksploruan trashëgiminë kulturore dhe format bashkëkohore të shprehjes artistike. Për të pasuruar përvojën e tyre, realizuam vizita dhe takime me organizata që fokusohen në gazetarinë alternative, të drejtat e njeriut dhe aktivizmin kulturor. 

Në fund të kampit, pjesëmarrësit ndanë historitë dhe përvojat e tyre përmes intervistave individuale, duke reflektuar mbi diversitetin, sfidat dhe realitetet e përbashkëta që i prekin, pavarësisht prejardhjes apo identitetit të tyre, këto intevista do të shfaqjen në formë ekspozitë më 18 Prill 2025. 

KAMPI I KATËRT NDËRKULTUROR 

Nga 18 deri më 23 shkurt 2025, organizuam kampin e fundit të projektit “Stories We Tell”, duke mbledhur 14 të rinj nga komunitete të ndryshme të Kosovës. 

Gjatë kampit, pjesëmarrësit u angazhuan në ligjërata mbi filmin, teknikat e xhirimit dhe montazhin, duke kombinuar të mësuarit teorik me ushtrime praktike. Përmes diskutimeve dhe aktiviteteve, ata eksploruan fuqinë e tregimit për të reflektuar mbi ndryshimet sociale dhe për të ndërtuar dialog mes tyre. 

Javën e kaluan mes xhirimeve, vizitave dhe punës në grupe, duke krijuar video portrete që pasqyruan perspektivat e tyre mbi njëri-tjetrin dhe mësimet e marra gjatë kampit. Kampi u përmbyll me një intervistë në formatin e një podcasti dhe reflektime mbi përvojën e përbashkët. Materialet e realizuara do të prezantohen në ekspozitën përfundimtare të projektit në prill.