Worksheets

Përshkrimi i filmit

Filmi dokumentar “Per hatër” flet për një grua në moshë të mesme e cila është martuar në moshën 25 vjeçare.

Ajo rrëfen jetën e saj martesore e cila në fillim ka qenë e mirë, ka pasur marrëdhënie të mira deri në momentin kur burri i saj kishte filluar të përdorte alkool.

Ajo ka pesë vajza dhe një djalë. Kur filloi të përdorte alkool, atëherë kishte filluar të sillte probleme në familje, thotë ajo.

Gruaja tregon se si ai kishte filluar të përdorte edhe fjalë banale dhe të gjitha këto i bënte karshi fëmijëve.

Thotë ta ketë përkrah familja e saj, dhe kanë kërkuar të ndahet nga burri, meqë ai sillte probleme në shtëpi, mirëpo gruaja nuk pranon të ndahet hatri i fëmijëve.

Ndarja nga burri po i shkakton gruas presion psiqik edhe për shkak të ndikimit social, fjalëve të të tjerëve. Gruas i bëjnë përshtypje fjalët e të tjerëve dhe pikërisht për këtë shkak ajo e ka të vështirë të ndahet.

Ajo rrëfen vuajtjen e saj shpirtërore, dhunën psiqike dhe fizike që ka përjetu sa herë që burri ka shkuar në shtëpi i dehur. Me gjithë vështirësitë që përjeton, ajo gjen forcë t’i motivojë fëmijët e saj për një jetë më të mirë.

Kompetencat

◎ Kompetenca e komunikimit dhe të të shprehurit - Komunikues efektiv (I.1 Shprehet përmes një forme të komunikimit, për një temë të caktuar në një material (prezantim) prej 200 fjalësh dhe veçon çështjet kryesore të ngritura në material (prezantim). I.2 Lexon rrjedhshëm një tekst në gjuhën amtare, të përbërë prej 3-5 paragrafëve, u përgjigjet pyetjeve të shtruara për llojin e tekstit, stilet e të shkruarit, tregon qëllimin dhe lidhjen ndërmjet përmbajtjes së paragrafëve.

◎ Kompetenca e të menduarit - Mendimtar kreativ (II.1 Në forma të ndryshme të të shprehurit prezanton mënyrën e grumbullimit, të zgjedhjes dhe të klasifikimit të informatave për fusha të ndryshme mësimore apo për një temë të caktuar, ofron argumente për zhvillimet aktuale lidhur me temën përkatëse (p.sh., temë nga shkenca, nga kultura, nga arti, nga sporti, nga shëndetësia, nga shoqëria, nga mjedisi etj).

◎ Kompetenca e të nxënit - Nxënës i suksesshëm (III.1 Demonstron shkathtësi funksionale në lexim-shkrim, në matematikë, në jetën e përditshme, në përmbushjen e kërkesave të ndryshme për kryerjen e një detyre apo aktiviteti dhe gjatë të nxënit të dijeve të reja në ndonjë fushë të caktuar mësimore.)

Rezultatet e të nxënit

⦿ Njeh përkufizimin e stresit;
⦿ Përcakton burimet kryesore të stresit;
⦿ Shpjegon reagimet fiziologjike dhe psikologjike ndaj stresorëve;
⦿ Harton plane për përballimin e stresit personal;
⦿ Vlerëson rëndësinë e shëndetit tonë fizik dhe mendor në një jetë pa stres.

Shfaqja e facilituar

Shfaqja e facilituar bazohet në ciklin e mësimnxënies. Një shfaqje filmi pasohet nga një diskutim me audiencën. Ky proces ndihmon audiencën që të shikojnë filmin me sy kritik, reflektojnë, angazhohen duke parë problemin lokal në kontekst global dhe përfundimisht të merren me veprime të duhura që mund të ndikojnë në ndryshim shoqëror. Ky udhëzues e faciliton diskutimin në ambient të klasës.

Shikoni filmin. Publiku e shikon filmin si grup.

Reflektoni mbi filmin. Pas shfaqjes, audienca reflekton mbi filmin e shiquar, duke i ndarë pikëpamjet, ndjenjat dhe reagimet e tyre. Thelbësore për këtë qasje është njohja që çdo individ ka ide dhe mban vlera që janë të rëndësishme për ta. Duke e ndarë këtë, njohja dhe respektimi i ideve, ndjenja dhe vlerave të ndryshme ndihmon audiencën për të mësuar nga njëri-tjetri.

Shihni përtej kontekstit lokal. Gjatë diskutimeve, pjesëmarrësit duhet të ekzaminojnë, debatojnë dhe analizojnë çështjet e ngritura në film. Për të marrë këtë më tej, audienca inkurajohet të lidh filmin dhe çështjet në jetën e tyre dhe t’i kuptojnë më mirë njohuritë e përbashkëta që ata posedojnë.

Vepro. Audienca i konsideron veprimet që mund të ndërmarrin për të adresuar varfërinë dhe pabarazinë në jetën e tyre dhe të komuniteteve, vendeve por edhe në nivel ndërkombëtar.