Përshkrimi i filmit

“Knock Down the House” është dokumentar që trajton historinë e katër grave politikane në ShBA të cilat ishin kandidate për Zyre të Kongresit në zgjedhjet e vitit 2018. Ato përmes organizimeve në terren, dhe aktivizmit të tyre të zellshëm refuzuan edhe paratë e korporatave por edhe nocionin që njerëzit e thjeshtë, e në veçanti gratë, nuk mund të zhvillojnë fushata të suksesshme politike.

Kolektivisht këto kandidate paralajmërojnë një ndryshim kulturor e politik për ta transformuar procesin e kandidimit dhe zgjedhjes së përfaqësuesve politikë. Ndryshimet e tilla kanë të bëjnë me ndryshim të qëndrimeve, sjelleve dhe normave ekzistuese drejtë ndërtimit të një shoqërie më gjithëpërfshirëse.

Kompetencat

I. Kompetenca e aktivizmit qytetar (Ndërtimi i qytetarisë aktive që është edhe e informuar dhe e bazuar është një nga pjesët kryesore e përmirësimit dhe mbështetjes së demokracisë. Në mënyrë që nxënësit të kuptojnë këtë më mirë, filmi jep shembuj dhe mund t’i fuqizojë ata në mënyrën e të menduarit rreth çështjeve që kanë të bëjnë me komunitetin e tyre)

II. Kompetenca e komunikimit dhe e të shprehurit (Me ndihmën e këtij dokumentari, nxënësit do të jenë gjendje të komunikojnë në mënyrë më efektive për sa i përket temave të politikës, qytetarisë aktive dhe barazisë gjinore. Diskutimet të cilat mund të jenë të përqendruara tek barazia gjinore do t’i shtyjnë nxënësit t’i komunikojnë
bindjet e tyre me argumente)

III. Kompetenca e të menduarit (Shikimi i dokumentarit dhe diskutimet që e pasojnë do t’i pajisë nxënësit në përvetësimin më të lehtë të koncepteve kyçe se si të aktivizohen dhe të jenë më aktiv në komunitetet e tyre dhe të lypin ndryshime e mos të jenë pasiv. Filmi i bën nxënësit të mendojnë në mënyrë kritike jo vetëm për proceset politike por edhe për pozitën e gruas në Kosovë në ndërlidhje me proceset politike)

IV. Kompetenca e të nxënit (Ky dokumentar do t’i nxit nxënësit që të kërkojnë përgjigje edhe për mënyrën se si funksionojnë politikat dhe proceset zgjedhore në Kosovë. Diskutimi do t’ua bën të mundur që edhe të pyesin rreth çështjeve që iu interesojnë e për të cilat mund të mos kenë pasur rast të flasin më herët)

Rezultatet e të nxënit

-T’i frymëzojë nxënësit që të kuptojnë rëndësinë e përfshirjes në proceset politike.
-T’i fuqizojë nxënësit që të angazhohen dhe të përfshihen në komunitetet e tyre nëpër çështje politiko-sociale.
-Ta shqyrtojë çështjen e barazisë dhe përfaqësimit në politike në Kosovë duke marrë shembull ShBA-në.
-Të bëhet e qartë shtypja e shumëfishtë që përjetojnë gratë kur dëshirojnë të kyçen në politikë.

Shfaqja e facilituar

Shfaqja e facilituar. Shfaqja e facilituar bazohet në ciklin e mësimnxënies. Një shfaqje filmi pasohet nga një diskutim me nxënësit. Ky proces ndihmon nxënësit që të shikojnë filmin me sy kritik, reflektojnë, angazhohen duke e parë problemin lokal në kontekst global, duke praktikuar anët pozitive dhe rrjedhimisht të merren veprime të duhura që mund të ndikojnë në ndryshim shoqëror. Ky udhëzues e faciliton diskutimin në ambientin e klasës.

Shikoni Filmin. Nxënësit e shikojnë filmin në grup.

Reflektoni mbi filmin. Pas shfaqjes, nxënësit reflektojnë mbi filmin e shikuar, duke i ndarë pikëpamjet, ndjenjat, emocionet dhe reagimet e tyre. Thelbësore për këtë qasje është njohja që çdo individ ka ide dhe mban vlera unike që janë të rëndësishme për ta. Duke e ndarë këtë, njohja dhe respektimi i ideve, ndjenjave dhe vlerave të ndryshme, ndihmon audiencën për të mësuar nga njëri-tjetri, duke krijuar kështu një diversitet.

Shihni përtej kontekstit lokal. Gjatë diskutimeve, pjesëmarrësit duhet të ekzaminojnë, debatojnë dhe analizojnë çështjet e ngritura në film. Për ta vazhduar këtë më tej, nxënësit inkurajohen të lidhin filmin dhe çështjet në jetën e tyre personale dhe t’i kuptojnë më mirë njohuritë e përbashkëta që ata posedojnë.

Vepro. Nxënësit i konsiderojnë veprimet që mund t’i ndërmarrin për të adresuar inferioritetin, vetëbesimin e vetëvlerësimin në jetën e tyre dhe të komuniteteve, vendeve edhe atyre të nivelit ndërkombëtar.